יַעֲקֹב

א    1 יַעֲקֹב עֶבֶד לֵאלֹהִים וּלְאָדוֹן יֵשׁוּעַ הַמָּשִׁיחַ אֶל-הָעֵדָה הַפְּזוּרָה מִשְּׁנֵים עָשָׂר הַשְּׁבָטִים שָׁלוֹם׃ 2 חִשְׁבוּ לָכֶם אַחַי אַךְ לְשִׂמְחָה אִם מַסּוֹת שֹׁנוֹת תִּקְרֶינָה אֶתְכֶם׃ 3 בְּדַעְתְּכֶם כִּי כוּר בֹּחֵן אֱמוּנַתְכֶם יִתֵּן לָכֶם אֶת-כֹּחַ הַסַּבָּל׃ 4 וּפְעֻלַּת כֹּחַ הַסַּבָּל תִּהְיֶה שְׁלֵמָה לְבַעֲבוּר תִּהְיוּ שְׁלֵמִים וּתְמִימִים וְלֹא יֶחְסַר לָכֶם דָּבָר׃ 5 וְאִישׁ מִכֶּם כִּי יֶחְסַר חָכְמָה יְבַקְשֶׁנָּה וְתִנָּתֶן-לוֹ מֵאֵת הָאֱלֹהִים הַנֹּתֵן לַכֹּל בְּרוּחַ נְדִיבָה וְאֵין-מַכְלִים דָּבָר׃ 6 אַךְ יְבַקֵּשׁ בֶּאֱמוּנָה וְלֹא יִפְסַח עַל-שְׁתֵּי סְעִפִּים כִּי הַפֹּסֵחַ עַל-שְׁתֵּי סְעִפִּים דּוֹמֶה הוּא לְגַלֵּי הַיָּם אֲשֶׁר הֵם עֹלִים וְיֹרְדִים מִפְּנֵי-רוּחַ׃ 7 וְהָאִישׁ הַהוּא אַל-יְדַמֶּה בְנַפְשׁוֹ כִּי-יִשָּׂא דָבָר מֵאֵת יְהוָֹה׃ 8 אִישׁ אֲשֶׁר חָלַק לִבּוֹ פֹּחֵז הוּא בְּכָל-נְתִיבֹתָיו׃ 9 אוּלָם אָח שָׁפֵל יִתְהַלֵּל בְּרוֹמְמוֹת נַפְשׁוֹ׃ 10 וְעָשִׁיר בְּשִׁפְלוּת נַפְשׁוֹ כִּי כְצִיץ חָצִיר כֵּן יַעֲבֹר׃ 11 כִּי כְצֵאת הַשֶּׁמֶשׁ בִּגְבֻרָתוֹ יִיבַשׁ חָצִיר אֻמְלַל צִיץ וּצְבִי תִפְאַרְתּוֹ נֹבֵל כֵּן יִבֹּל הֶעָשִׁיר עֲלֵי-שְׁבִיל מְרוּצָתוֹ׃ 12 אַשְׁרֵי הָאִישׁ הַנִּבְחַן בְּמַסָּה כִּי בְהִבָּחֲנוֹ יִשָּׂא עֲטֶרֶת הַחַיִּים אֲשֶׁר-דִבֶּר אֲדֹנָי לְאֹהֲבָיו׃ 13 אַל-יֹאמַר הַנִּכְשָׁל בְּמַסָּה הָאֱלֹהִים נִסָּה אֹתִי כִּי כַאֲשֶׁר אֵין מְנַסֶּה אֶת-הָאֱלֹהִים בְּרָע כֵּן גַּם-הוּא לֹא-יְנַסֶּה אִישׁ׃ 14 אַךְ כָּל-אִישׁ תַּאֲוַת נַפְשׁוֹ תְּנַסֵּהוּ כִּי יִמָּשֵׁךְ וְיִלָּכֶד-בָּהּ׃ 15 וְהַתַּאֲוָה אַחֲרֵי אֲשֶׁר הָרְתָה תֵּלֵד חֵטְא וְהַחֵטְא כַּאֲשֶׁר הוּא שָׁלֵם יוֹלִיד מָוֶת׃ 16 אַל-תַּתְעוּ אֶת-נַפְשְׁכֶם אַחַי הַיְקָרִים׃ 17 כָּל-מַתָּנָה טוֹבָה וְכָל-תְּשׁוּרָה שְׁלֵמָה יֹרֶדֶת מֵעָל מֵאֵת אֲבִי הַמְּאֹרֹת אֲשֶׁר אֵין-חֲלִיפוֹת לוֹ אַף לֹא צֵל תְּמוּרָה׃ 18 וְהוּא בְּאַוַּת נַפְשׁוֹ הוֹלִיד אֹתָנוּ בִּדְבַר אֲמִתּוֹ לִהְיוֹת לוֹ כְּרֵאשִׁית תְּבוּאָתוֹ בְּתוֹךְ יְצוּרָיו׃ 19 לָכֶן אַחַי הַיְקָרִים יְהִי כָל-אִישׁ מִכֶּם מָהִיר לִשְׁמֹעַ בּשֵׁשׁ לְדַבֵּר וּבשֵׁשׁ לִקְצָף-קָצֶף׃ 20 כִּי-קֶצֶף אָדָם לֹא יִפְעַל צִדְקַת אֱלֹהִים׃ 21 עַל-כֵּן הָסִירוּ מֵעֲלֵיכֶם כָּל-גִּלּוּלִים וְכֹבֶד רִשְׁעָה וּבַעֲנָוָה הַחֲזִיקוּ בַתּוֹרָה הַנְּטוּעָה בְתוֹכֲכֶם אֲשֶׁר יֶשׁ-בָּהּ לְהוֹשִׁיעַ לְנַפְשֹׁתֵיכֶם׃ 22 וּרְאוּ לִהְיוֹת עֹשִׂים דְּבַר הַמִּצְוָה וְלֹא רַק שֹׁמְעִים לְאֹזֶן לְהַתְעוֹת אֶת-נַפְשְׁכֶם׃ 23 כִּי הַשֹּׁמֵעַ דָּבָר וְלֹא יַעֲשֶׂנּוּ נִמְשַׁל הוּא לְאִישׁ הַמַּבִּיט תֹּאַר פָּנָיו בִּרְאִי מְלֻטָּשׁ׃ 24 כִּי הוּא מַבִּיט בְּפָנָיו וּכְרֶגַע הוֹלֵךְ וְשֹׁכֵחַ מַה-תַּאֳרוֹ׃ 25 אַךְ הַשָּׂם עֵינוֹ בַתּוֹרָה הַתְּמִימָה אֲשֶׁר חֹפֶשׁ בָּהּ וְהֹגֶה בָהּ תָּמִיד וְאֶינֵנּוּ שֹׁמֵעַ וְשֹׁכֵחַ כִּי אִם-עֹשֶׂה הַדָּבָר לְמַעֲנֵהוּ הָאִישׁ הַהוּא יְאֻשַּׁר בְּמַעֲשֵׂהוּ׃ 26 וְאִם-יְדַמֶּה אִישׁ מִכֵּם לִהְיוֹת עֹבֵד אֱלֹהִים וְלֹא יִשְׁמֹר רֶסֶן לְשׁוֹנוֹ כִּי אִם-יַתְעֶה אֶת-לְבָבוֹ עֲבֹדָתוֹ הֶבֶל הִיא׃ 27 זֹאת הִיא עֲבֹדָה טְהוֹרָה וּתְמִימָה לִפְנֵי אֱלֹהֵינוּ אָבִינוּ לְבַקֵּר יְתוֹמִים וְאַלְמָנוֹת בִּמְצוּקוֹתֵיהֶם וּלְהִשְׁתַּמֵר מִן-שֶׁמֶץ דָּבָר מִן-עֶרְוַת הָאָרֶץ׃

ב    1 אַל-תַּכִּירוּ פָנִים אַחַי בֶּאֱמוּנַת יֵשׁוּעַ הַמָּשִׁיחַ אֲדֹנֵינוּ אֲדוֹן הַכָּבוֹד׃ 2 כִּי אִם-יָבֹא אִישׁ אֶל-בֵּית הַכְּנֵסֶת לָכֶם הָדוּר בְּטַבְּעוֹת זָהָב וְלָבוּשׁ מַחֲלָצוֹת וּבָא שָׁם גַּם-עָנִי בִּבְגָדִים צוֹאִים׃ 3 וּפְנִיתֶם אֶל-הַלָּבוּשׁ מַחֲלָצוֹת לֵאמֹר שְׁבָה-נָּא פֹה בְּמוֹשָׁב נִכְבָּד וְאֶל-הֶעָנִי תֹאמְרוּן אַתָּה עֲמֹד שָׁם אוֹ שֵׁב לַהֲדֹם רַגְלָי׃ 4 הַאִם לֹא לֵב וָלֵב בְּקִרְבְּכֶם וְאִם לֹא כְשֹׁפְטִים חֹרְשֵׁי רַע אַתֶּם׃ 5 שְׁמָעוּנִי אַחַי הַיְקָרִים הֲלֹא אֱלֹהִים בָּחַר בַּעֲנִיֵּי הָאָרֶץ לִהְיוֹת עֲשִׂירֵי אֱמוּנָה וְיֹרְשֵׁי מַלְכוּת כַּאֲשֶׁר דִּבֶּר לְאֹהֲבָיו׃ 6 וְאַתֶּם הוֹבַשְׁתֶּם פְּנֵי הֶעָנִי הֲלֹא הָעֲשִׁירִים הֵם יַעַשְׁקוּן וְיִסְחֲבוּן אֶתְכֶם לִמְקוֹם הַמִּשְׁפָּט׃ 7 וְגַם הַשֵּׁם הַטּוֹב אֲשֶׁר נִקְרָא עֲלֵיכֶם יָשִׂימוּ אֹתוֹ לַחֲרָפוֹת׃ 8 הִנֵּה אִם תִּשְׁמְרוּ דָת הַמַּלְכוּת כַּכָּתוּב בַּתּוֹרָה וְאָהַבְתָּ לְרֵעֲךָ כָּמוֹךָ תֵּיטִיבוּ לַעֲשׂוֹת׃ 9 אוּלָם אִם-תִּשְׂאוּ פָנִים תֶּחֶטְאוּ בְמַעֲשֵׂיכֶם וְעַל-פִּי הַתּוֹרָה תִּשָּׁפְטוּ כְּפֹשְׁעִים בָּהּ׃ 10 כִּי הַשֹּׁמֵר אֶת-כָּל-הַתּוֹרָה וְעֹבֵר אַחַת מִמִּצְוֹתֶיהָ הוּא אָשֵׁם כְּעֹבֵר כָּל-מִצְוֹתֶיהָ׃ 11 כִּי הָאֹמֵר לֹא תִּנְאָף גַּם-הוּא אֹמֵר לֹא תִּרְצָח וְאִם-אַתָּה לֹא נָאַפְתָּ אַךְ רָצַחְתָּ פּשֶׁעַ בַּתּוֹרָה הִנֶּךָ׃ 12 וְאַתֶּם כֹּה תְדַבְּרוּן וְכֹה תַעֲשׂוּן כַּעֲתִדִים לְהִשָּׁפֵט עַל-פִּי הַתּוֹרָה אֲשֶׁר חֹפֶשׁ בָּהּ׃ 13 כִּי אֵין חֶסֶד בַּדִּין לְלֹא חָסֶד אַךְ כֹּחַ הַחֶסֶד יָעֹז עַל-כֹּחַ הַדִּין׃ 14 אַחַי מַה-יּוֹעִיל לְאִישׁ הָאֹמֵר כִּי אֱמוּנָה בוֹ וּמַעֲשִׂים אֵין לוֹ הֲתוּכַל אֱמוּנָה לְהוֹשִׁיעַ-לוֹ׃ 15 אִם אָח אוֹ-אָחוֹת יִהְיוּ עֵירֻמִּים וְאֵין לָהֶם לֶחֶם חֻקָּם׃ 16 וְאִישׁ מִכֶּם יֹאמַר אֲלֵיהֶם לְכוּ לְשָׁלוֹם וְחַם-לָכֶם וּשְׂבַעְתֶּם וְלֹא-תִתְּנוּ לְנַפְשָׁם דֵּי-מַחְסֹרָם מַה-יִּתֵּן לָהֶם דְּבַר שְׂפָתָיִם׃ 17 כֵּן גַּם-הָאֱמוּנָה אִם מַעֲשִׂים אֵין עִמָּהּ מֵתָה הִיא לְבַדָּהּ׃ 18 אֲבָל יֹאמַר אִישׁ הֵן אַתָּה יֵשׁ אֱמוּנָה בְךָ וַאֲנִי יֶשׁ-לִי מַעֲשִׂים הַרְאֵנִי אֶת-אֱמוּנַתְךָ בִּבְלִי מַעֲשֶׂיךָ וַאֲנִי מִתּוֹךְ מַעֲשַׂי אַרְאֲךָ אֶת-אֱמוּנָתִי׃ 19 אַתָּה מַאֲמִין כִּי אֱלֹהִים אֶחָד הוּא וְהֵיטַבְתָּ לְהַאֲמִין וְגַם הַשֵּׁדִים כֵּן יַאֲמִינוּ וְיָחִילוּן׃ 20 אַךְ עַתָּה רֹעֵה רוּחַ אִם חָפַצְתָּ לָדַעַת כִּי אֱמוּנָה בִּבְלִי מַעֲשִׂים מֵתָה הִיא׃ 21 הֲלֹא בְמַעֲשָׂיו נִצְדַּק אַבְרָהָם אָבִינוּ בְּהַעֲלֹתוֹ אֶת-יִצְחָק בְּנוֹ עַל-גַּב הַמִּזְבֵּחַ׃ 22 הִנְּךָ רֹאֶה כִּי-הָאֱמוּנָה נָתְנָה-כֹּחַ לְמַעֲשָׂיו וּמִתּוֹךְ מַעֲשָׂיו נֶעֶשְׂתָה אֱמוּנָתוֹ שְׁלֵמָה׃ 23 וְהוּקַם הַכָּתוּב הָאֹמֵר וְהֶאֱמִן אַבְרָהָם בַּיְהוָֹה וַתֵּחָשֶׁב-לוֹ צְדָקָה וְגַם נִקְרָא אֹהֵב אֱלֹהִים׃ 24 הִנֵּה רֹאִים אַתֶּם כִּי בְמַעֲשִׂים יִצְדַּק אִישׁ וְלֹא בֶאֱמוּנָה לְבַדָּהּ׃ 25 וְכֵן גַּם-רָחָב הַזּוֹנָה נִצְדְּקָה בְמַעֲשֶׂיהָ כַּאֲשֶׁר הֵבִיאָה אֶת-הַמַּלְאָכִים אֶל-בֵּיתָהּ וַתְּשַׁלְּחֵם בְּדֶרֶךְ אַחֶרֶת׃ 26 כִּי כְמוֹ-גוּף בְּלֹא נְשָׁמָה מֵת הוּא כֵּן גַּם-אֱמוּנָה בִּבְלִי מַעֲשִׂים מֵתָה הִיא׃

ג    1 לֹא תָקִימוּ מִכֶּם אַחַי מוֹרִים רַבִּים בְּדַעְתְּכֶם כִּי תִכְבַּד עָלֵינוּ יַד-הַמִּשְׁפָּט׃ 2 כִּי רַבּוֹת נִכְשַׁלְנוּ כֻלָּנוּ וּמִי אֲשֶׁר לֹא-יִכָּשֵׁל בִּשְׂפָתָיו אִישׁ תָּמִים הוּא וְיָדָיו רַב-לוֹ לָשִׂים מַעֲצוֹר לְכָל-בְּשָׂרוֹ׃ 3 הִנֵּה פִי הַסּוּס נִבְלֹם בְּמֶתֶג לְבַעֲבוּר יִשְׁמַע וְיִנָּטֶה לְפִי רְצוֹנֵנוּ׃ 4 וְהִנֵּה גַּם-אֱנִיּוֹת גְּדֹלֹת הַנֶּהְדָּפוֹת בְּרוּחַ עַזָּה יַטֶּה אֹתָן מָשׁוֹט קָטֹן אֶל-אֲשֶׁר יַחְפֹּץ רוּחַ הַחֹבֵל׃ 5 כֵּן גַּם-הַלָּשׁוֹן אֵבָר קָטֹן וּמְדַבֶּרֶת גְּדֹלוֹת אֵיךְ מְעַט אֵשׁ תִּבְעַר יַעַר גָּדוֹל׃ 6 וְהַלָּשׁוֹן אֵשׁ הִיא הַלָּשׁוֹן עוֹלָם קָטֹן וּמְלֹאוֹ אָוֶן נְתוּנָה בְתוֹךְ אֵבָרֵינוּ מְחֹלֶלֶת כָּל-הַבָּשָׂר מְלַהֶטֶת גַּלְגַּל הַטֶּבַע וְיֹקֶדֶת מֵאֵשׁ גֵּיהִנֹּם׃ 7 כָּל-מִין בְּהֵמָה וְעוֹף וְרֶמֶשׂ וְחַיְתוֹ-יָם נִכְבָּשִׁים הֵם כֻּלָּם כִּי הָאָדָם לְמִינֵהוּ כֹּבֵשׁ אֹתָם׃ 8 אַךְ הַלָּשׁוֹן לְבַדָּהּ אֵין לְאֵל יַד אָדָם לְכָבְשָׁהּ רָעָה הִיא מֵאֵין מַעְצוֹר וּמְלֵאָה חֲמַת מָוֶת׃ 9 בָּהּ נְבָרֵךְ יְהוָֹה אָבִינוּ וּבָהּ נְקַלֵּל אֲנָשִׁים אֲשֶׁר נַעֲשׂוּ בְּצֶלֶם אֱלֹהִים׃ 10 מִפֶּה אֶחָד תֵּצֵא בְרָכָה וּקְלָלָה לֹא-כֵן אַחַי לֹא-יֵעָשֵׂה כֵן בָּכֶם׃ 11 הֲתָקִיר בְּאֵר מֵימֵיהָ מְתוּקִים וּמָרִים מִמּוֹצָא אֶחָד׃ 12 הֲתַעֲשֶׂה תְאֵנָה אַחַי עִנְבֵי גֶפֶן וְהַגֶּפֶן הֲתוֹצִיא תְאֵנִים כֵּן מִמַּיִם מְלוּחִים לֹא יֵצְאוּ מְתוּקִים׃ 13 מִי חָכָם וְנָבוֹן בָּכֶם יַרְאֵנוּ אֶת-מַעֲשָׂיו מִתּוֹךְ מַעְגְּלֵי חַיָּיו הַטּוֹבִים בְּעַנְוַת חָכְמָתוֹ׃ 14 וְאִם-חֲמַת קִנְאָה בָכֶם וְלִבְּכֶם יְגָרֶה מָדוֹן לָמָּה תִּתְהַלְלוּ וּתְכַחֵשׁוּ נֶגֶד פְּנֵי הָאֱמֶת׃ 15 לֹא זוּ הַחָכְמָה הַבָּאָה מֵעָל כִּי הִיא מִלְּמַטָּה לָאָרֶץ מִטֶּבָע הַבָּשָׂר אוֹ הַשֵּׁדִים׃ 16 כִּי-בִמְקוֹם קִנְאָה וּמְדָנִים שָׁם מְהוּמָה וְכל-דְּבַר בְּלִיָּעַל׃ 17 אַךְ הַחָכְמָה הַיֹּרֶדֶת מֵעָל טְהוֹרָה הִיא פִּיהָ תִפְתַּח לְשָׁלוֹם וּבַעֲנָוָה דְבָרֶיהָ נוֹחָה הִיא לְהִתְרַצּוֹת מְלֵאָה רַחֲמִים וּפִרְיָהּ טוֹב אֵין עִמָּהּ מַשּׂא פָנִים וְאֵין חֲנֻפָּה בָּהּ׃ 18 זֶה פְּרִי הַצְּדָקָה זָרֻעַ לָבֶטַח לְעֹשֵׂי שָׁלוֹם׃

ד    1 מֵאַיִן תִּגְרָה וּמִלְחָמוֹת בֵּינֵיכֶם אִם לֹא מִתּוֹךְ הַתַּאֲוֹת הַפֹּרְצוֹת בְּאֵבָרֵיכֶם׃ 2 תִּתְאַוּוּ וְאֵין לָכֶם תְּרַצְּחוּ וּתְקַנְאוּ וִיְדֵיכֶם לֹא תַעֲשֶׂינָה תוּשִׁיָּה תִּתְגְּרוּ וְתִלָּחֲמוּ וְאֵין לָכֵם מְאוּמָה יַעַן לֹא שְׁאֶלְתֶּם׃ 3 שְׁאֶלְתֶּם וְלֹא הִשַּׂגְתֶּם יַעַן בְּרָעָה שְׁאֶלְתֶּם לְמַלֵּא מִשְׁאֲלוֹת תַּאֲוַתְכֶם׃ 4 הַאִם לֹא יְדַעְתֶּם נֹאֲפִים וְנֹאֲפוֹת כִּי-אַהֲבַת הָעוֹלָם אֵיבָה הִיא לֵאלֹהִים לְזֹאת אֵפוֹא מִי הוּא הֶחָפֵץ לִהְיוֹת אֹהֵב הָעוֹלָם אֹיֵב לֵאלֹהִים יֵחָשֵׁב׃ 5 הַאִם תַּחְשְׁבוּן כִּי הַמִּקְרָא יַזְהִיר לָרִיק וְהָרוּחַ הַשֹּׁכֵן בְּקִרְבֵּנוּ הַאִם תַּאֲוָתוֹ קִנְאָה׃ 6 אָכֵן הוּא נֹתֵן יֶתֶר חֵן עַל-כֵּן הוּא אֹמֵר יְהוָֹה לַלֵּצִים יָלִיץ וְלַעֲנָוִים יִתֶּן-חֵן׃ 7 לָכֵן הִכָּנְעוּ מִפְּנֵי אֱלֹהִים הִתְיַצְּבוּ בִּפְנֵי הַשָּׂטָן וְיָנוּס מִפְּנֵיכֶם׃ 8 קִרְבוּ אֶל-אֱלֹהִים וְיִקְרַב אֲלֵיכֶם רַחֲצוּ יְדֵיכֶם מְתֵי-אָוֶן הִזַּכּוּ בִלְבַבְכֶם בַּעֲלֵי לֵב וָלֵב׃ 9 הִתְעַצְּבוּ הִתְאַבְּלוּ וְהֵילִילוּ שְׂחוֹק יֵהָפֵךְ לָכֶם לְאֵבֶל וְשִׂמְחָה לְתוּגָה׃ 10 הַשְׁפִּילוּ נַפְשְׁכֶם לִפְנֵי יְהוָֹה וְהוּא יָרִים אֶתְכֶם׃ 11 אַחַי לֹא תְדַבְּרוּ אִישׁ בַּעֲמִיתוֹ הַמְדַבֵּר בְּאָחִיו וְהַדָּן אֶת-אָחִיו הוּא מְדַבֵּר בַּתּוֹרָה וְדָן אֶת-הַתּוֹרָה וְאִם אֶת-הַתּוֹרָה תָדִין אֵינְךָ עֹשֵׂה הַתּוֹרָה כִּי אִם-שֹׁפְטָהּ׃ 12 אֶחָד הוּא הַמְחֹקֵק וְהַשֹּׁפֵט הוּא אֲשֶׁר הַכֹּחַ בְּיָדוֹ לְהַצִּיל וּלְאַבֵּד וּמִי אַתָּה הוּא כִּי תִשְׁפֹּט אֶת-עֲמִיתֶיךָ׃ 13 הוֹי הָאוֹמְרִים נֵלְכָה לָּנוּ הַיוֹם אוֹ לְמָחָר לָעִיר הַהִיא וְנִסְחַר שָׁם שָׁנָה אַחַת וְנַעֲשֶׂה לָּנוּ חָיִל׃ 14 וְאַתֶּם לֹא תֵדְעוּן מַה-יֵּלֵד יוֹם מָחָר כִּי מֶה חַיֵּיכֶם קִיטוֹר יֵרָאֶה כְּרֶגַע וְאַחַר יַעֲלֶה בַתֹּהוּ׃ 15 אַךְ כָּזֹאת עֲלֵיכֶם לֵאמֹר אִם-יִרְצֶה יְהוָֹה וְנִחְיֶה נַעֲשֶׂה כָזֹאת אוֹ כָּזֹאת׃ 16 רַק אַתֶּם מִתְהַלֲּלִים בְּגֵאוּתְכֶם כָּל-תְּהִילָּה כָזֹאת רָעָה הִיא׃ 17 וְכָל-הַיֹּדֵעַ לַעֲשׂוֹת כַּטּוֹב וְכַיָּשָׁר וְלֹא יַעֲשֶׂנּוּ חֶטְאוֹ יִשָׂא׃

ה    1 הוֹי עֲשִׁירֵי עָם זַעֲקוּ הֵילִילוּ לַצָּרוֹת אֲשֶׁר תִּקְרֶינָה אֶתְכֶם׃ 2 עָשְׁרְכֶם רָקָב וּבִגְדֵיכֶם יֹאכַל עָשׁ׃ 3 הַזָּהָב יוּעַם הַכֶּסֶף יִשְׁנֶא וְהוֹן נִמְאָס הַזֶּה יַעֲנֶה בָכֶם לְעֵד וְאָכַל בְּשַׂרְכֶם כָּאֵשׁ זֶה הוּא הָאוֹצָר אֲצַרְתֶּם לָכֶם לְיוֹם אַחֲרוֹן׃ 4 הִנֵּה שְׂכַר הַפֹּעֲלִים יִזְעָק שְׂכַר קֹצְרֵי שְׂדֹתֵיכֶם אֲשֶׁר עֲשַׁקְתֶּם וְזַעֲקַת הַקֹּצְרִים בָּאָה בְאָזְנֵי יְהוָֹה צְבָאוֹת׃ 5 הִתְעַנַּגְתֶּם בָּאָרֶץ הִתְעַדַּנְתֶּם וַיִּשְׁמַן לִבְּכֶם כְּמוֹ לְיוֹם טִבְחָה׃ 6 הִרְשַׁעְתֶּם הֲמִיתֶּם אֶת-הַצַּדִּיק וְהוּא לֹא-עָמַד בִּפְנֵיכֶם׃ 7 עַל-כֵּן דֹּמּוּ אַחַי עַד-בֹּא הָאָדוֹן הִנֵּה הָאִכָּר יְחַכֶּה לִתְבוּאַת הָאֲדָמָה הַטּוֹבָה יְיַחֵל עַד-אֲשֶׁר יָבוֹא יוֹרֶה וּמַלְקוֹשׁ׃ 8 כֵּן הוֹחִילוּ גַם-אַתֶּם אַמְּצוּ אֶת-לִבְּכֶם כִּי פְנֵי הָאָדוֹן הִנֵּה בָּאִים׃ 9 אַל-תִּלּוֹנוּ אַחַי אִישׁ עַל-רֵעֵהוּ וְלֹא תֶאְשְׁמוּ בַמִּשְׁפָּט הִנֵּה הַשֹּׁפֵט עֹמֵד לַפָּתַח׃ 10 קְחוּ לָכֶם אַחַי לְמוֹפֵת צָרוֹת הַנְּבִיאִים וְאֹרֶךְ רוּחָם הַנְּבִיאִים אֲשֶׁר דִּבְּרוּ בְּשֵׁם יְהוָֹה׃ 11 הִנֵּה אֲנַחְנוּ מְאַשְּׁרִים כֹּחַ הַסַּבָּל וְכֹחַ סִבְלוֹת אִיּוֹב הֲלֹא שְׁמַעְתֶּם וְגַם רְאִיתֶם מֶה-הָיְתָה אַחֲרִיתוֹ מֵאֵת יְהוָֹה כִּי יְהוָֹה רַחוּם וְחַנּוּן הוּא׃ 12 וְעַתָּה אַחַי לִפְנֵי כָל-דָּבָר אַל-תִּשָּׁבְעוּ לֹא בַשָּׁמַיִם וְלֹא בָאָרֶץ וְלֹא כָל-שְׁבוּעָה אַחֶרֶת וְכֹה יִהְיֶה דְבַרְכֶם הֵן הֵן אוֹ לֹא לֹא פֶּן-תֵּעָנְשׁוּ בַּמִּשְׁפָּט׃ 13 אִם-יֵצַר לְאִישׁ מִכֶּם יִתְפַּלֵּל וְאִם לִבּוֹ טוֹב עָלָיו יְזַמֵּר׃ 14 אִם-יִהְיֶה בָּכֶם חֹלֶה יִקְרָא לְזִקְנֵי הָעֵדָה וְהִתְפַּלְלוּ עָלָיו וּמָשְׁחוּ אֹתוֹ שֶׁמֶן בְּשֵׁם יְהוָֹה׃ 15 וּתְפִלָּה עִם-אֱמוּנָה תַּעֲזֹר לַחֹלֶה וַיהוָֹה יְקִימֶנּוּ וְאִם חָטָא וְנִסְלַח-לוֹ׃ 16 לָכֵן הִתְוַדּוּ עֲוֹנוֹתֵיכֶם אִישׁ אֶל-רֵעֵהוּ וְהִתְפַּלְלוּ אִישׁ בְּעַד רֵעֵהוּ וְרָפָא לָכֶם כִּי-תְפִלַּת צַדִּיק רַב כֹּחָהּ בִּפְעֻלָּתָהּ׃ 17 אֵלִיָּהוּ הָיָה בַּעַל נֶפֶשׁ כָּמֹנוּ וְהִתְפַּלֵּל לְבִלְתִּי הֱיוֹת מָטָר וְלֹא-הָיָה מָטָר עַל-הָאָרֶץ שָׁלֹשׁ שָׁנִים וְשִׁשָּׁה חֳדָשִׁים׃ 18 וַיָּשָׁב וַיִּתְפַּלֵּל וְהַשָּׁמַיִם הֶעֱרִיפוּ מָטָר וְהָאָרֶץ נָתְנָה אֶת-יְבוּלָהּ׃ 19 אַחַי אִם אֶחָד מִכֶּם יָסוּר מִדֶּרֶךְ הָאֱמֶת וְאִישׁ אַחֵר יְשִׁיבֶנּוּ׃ 20 יֵדַע-נָא כִּי הַמֵּשִׁיב אֶת-הַחוֹטֵא מִדֶּרֶךְ פִּשְׁעוֹ יַצִּיל נֶפֶשׁ מִמָּוֶת וִיכַסֶּה עַל-פְּשָׁעִים רַבִּים׃


Index              Poster